MY INSPIRATIONAL GHAZAL “JIGAR” (COURAGE)

 

Title:- “JIGAR”

 

Kar Lo Gar Apni Mushkil Se Dosti To Mushkil Aasaan Lagti hai,

Dikhao Mushkil ko Jigar Apna To mushkil Khud Pareshan Lagti hai,

 

Jo Milna Likha hai Hamaari Taqdeer me Wo To Milega hi Hamein,

Par Cheen Lo kuchh Taqdeer se To Taqdeer Bhi Hairaan Lagti hai.

 

Jab Bhara ho Jigar me Jazba-e-Junoon Apni Manzil ko Pane ka,

To Phir Har Fikra Aur  Har Khauf Se Tabiyat Anjaan Lagti hai.

 

Gar Lagi hui Ho Aag Jigar me Barson Se Kuchh Haasil Karne ki,

To Phir Aag Se Kheltey Waqt Aag Se Puraani Pehchaan Lagti hai.

 

Ye Sirf Jigar hi hai Jo Deta hai Saath Andhere me bhi hamara,

Nahi To Andhere me Khud ki Parchhaai Bhi Beimaan Lagti hai.

 

Nahi  Karta Gham ‘Aatif’ Apni Mushkil Se Kabhi Haar Jaane pe,

Ki Mushkil ko Jigar Dikhane Me bhi to ek Alag hi Shaan Lagti hai.

A Ghazal Composed BY: -SYED SABAH UR REHMAN-Aatif’